Ndryshe nga Shqipëria, Bosnja nuk duket se do të organizojë ndonjë festë të veçantë pas vendimit për liberalizimin e vizave.

I intervistuar nga “Top Channel”, ministri boshnjak për Sigurinë, Sadik Ahmetoviç, foli për një ditë të madhe për vendin e tij, por shtoi se qeveria nuk do të tregohet euforike, pasi ky është vetëm fillimi i rrugës drejt Bashkimit Europian. “Pas fundit të luftës kjo është arritja më e madhe. Ne mund të tregojmë se i përkasim shoqërisë europiane. Por s’ka arsye për të qenë euforikë. Qëllimi ynë madhor është statusi i kandidatit. Festimi do të vijë kur të hyjmë në BE”, ka deklaruar Ahmetoviç. Ai i ka cilësuar si diçka normale masat e marra nga vendet e BE-së për parandalimin e ndonjë fluksi azilkërkuesish dhe ka dhënë garancinë e tij se shteti boshnjak do bëjë gjithçka për respektimin e kritereve që vijnë pas heqjes së vizave. “Ata që na e hoqën regjimin e vizave kanë të drejtë të kërkojnë nga ne detyrime dhe përgjegjësi. Garantoj se do plotësojmë të gjitha kushtet në ‘road map’-in tonë”, ka pohuar Ahmetoviç.