Policia ende nuk e di identitetin e personave të cilët dje vodhën 21 ikona nga kisha e Shën Atanasit në fshatin Llukovë të Strugës. Ikonat e vjedhura janë origjinale dhe të trashëguara nga djali i  Diço Zografit, Avrami, piktor i fundit i ikonave në këto hapësira. Vjedhësit së pari hynë në lokalin ndihmës e pastaj me kazmë e thyen portën. Kisha është ndërtuar në vitin 1883. Vjedhësit u orvatën të vjedhin edhe gjashtë ikonat e tjera të cilat megjithatë i lanë në dyshemenë e kishës. Gjatë viteve të kaluara nga kishat në rajonin e Strugës janë vjedhur më shumë se 100 ikona të vlefshme.
 “Jam shumë i dëshpëruar nga ajo që na ndodhi. Si do të ndjeheshi ju nëse hajnat hynë në shtëpinë tuaj dhe ua marrin sendin më të vlefshëm? Kjo është shtëpia ime e dytë dhe si të ndjehem tani”, u shpreh Sllavko Budinovski, nikoqir i kishës.
“Kisha ishte e siguruar mirë. Askush nuk shpresonte në këtë. E gjithë kjo punë ishte planifikuar mirë, nuk vinë ata përnjëherë”, deklaroi  Cvetin Bogdanovski, banor i Llukovës.
“Ne po ndërmarrim masa që të vërtetojmë se a bëhet fjalë për grupin katër anëtarësh i cili si i tillë funksionon ose ka anëtarë të tjerë që janë në përbërje të këtij grupi ndërkombëtar. Konsiderojmë se kjo vjedhje nuk ka lidhje me ato të mëparshmet”, deklaroi Stefan Dimovski, zëdhënës i SPB Ohër.