Një aeroplan privat me 51 pasagjerë dhe anëtarë ekuipazhi në bord është përplasur në kopështin e një fabrike celiku në jug të Venezuelës, ndërkohë që ka marrë flakë duke vrarë 15 persona. Autoritetet kanë thënë se nga mbeturinat e aeroplanit të ndërtuar nga kompania franceze ATR-42 dhe në pronësi të agjensisë shtetërore të fluturimeve Conviasa, janë nxjerrë 36 të mbijetuar.

Aeroplani po fluturonte nga ishulli i Karaibeve, Margarita, drejt qytetit industrial jugor të Puerto Ordaz, kur ka rënë pranë portave të mullirit të madh Sidor në brigjet e lumit Orinoko. Ndërkohë punëtorët e fabrikës dhe zjarrfikësit kanë shkuar në vendin e ngjarjes dhe kanë nxjerrë pasagjerët nga aeroplani i djegur.